4大旅行照令女生無眼睇 男生勿亂影

去旅行會為自己影相留念相信係每個人都一定會做嘅事，不過影還影，影完放上社交網絡俾全世界睇到又係另一回事。道理就好似情侶影放閃相唔係問題，但係下下都放上網俾人睇有時真係會有啲令人眼冤㗎。而各位男士，去旅行如果想影完相放上網同人分享，就記得要小心最好唔好係以下呢幾款，因為只會令女生無眼睇。

1. 單人自拍大頭

雖然去旅行少不免都會自拍，不過自拍大頭相配上旅行caption ，會令到女仔覺得你自戀之餘更加係圖文不符，對你嘅好感自然會下降。

2. yeah 手勢到此一遊照

去旅行梗係唔少得響著名旅遊景點前影返張相然後打卡，不過yeah 手勢加上著名景點做背景，就會令女士們覺得張相老土兼無新意，就算想影到此一遊相都係自然post為之最好。

3. 黑超超Chok相

去旅行好多人都會帶太陽眼鏡阻擋陽光，不過有唔少男士鍾意帶住副太陽眼鏡Chok住影相，呢類型嘅相通常都會俾人嘅感覺係MK味濃，所以最好都係可免則免。

4. 酒店房Show肌相

有啲男士平時有做開gym，對自己嘅身形都充滿自信，去旅行嘅時候亦都會鍾意喺酒店影下啲show 肌相，不過呢啲相就會令到女士覺得你係show off ，唔單止唔會因為你嘅身形好而加分，甚至有種莫名嘅討厭感覺。